21‏/11‏/2010

عزيز بركات والافلام الطويلة

To see the list At the IMDB site: Click Here
مفضل مشاهدة القائمة على موقع IMBD: اضغط هنا


City of God (2002)
Gladiator (2000)
Seven Pounds (2008)
Sex Drive (2008)
Saw III (2006)
Avatar (2009)
Braveheart (1995)
The Godfather (1972)
Occupation 101 (2006 Documentary)
Sin City (2005)
The Prestige (2006)
Resident Evil (2002)
District 9 (2009)
Kick-Ass (2010)
Eagle Eye (2008)
If Only (2004)
Toy Story (1995)

19‏/11‏/2010

عايشـة مع وحده, بـلاي!

  • فيديو بســيط, لكن التعقيد هو قمة البسـاطة احيـانًا!
  • بنصحكم تحضروه HD! يعني 720P
  • استمتعوا :)



شو رأيكم بالفيديو؟؟؟؟ :)

قصاصات ورق - الحلقة الثانية : امنلي بيت, ان شاء الله خربة بطلوزة الجبل


  • قصاصات ورق هي سلسلة مواضيع لم تنقح ولم اجد التوليفة الكاملة للموضوع, هي مواضيع جَنينية غير مكتملة الكتابة, لكنها تستحق النشر برأيي لذا اقدمها بسلسلة خاصة "قصاصات ورق"!


كيف تسكن في تل ابيب بدون ما تضطر تبيع كلوة ابوك الشمال(اليسرى يعني)؟
(ملاحظةجواب هذا السؤال, هو غير ممكن, مع نظرة احتقار واستهبال للسائل على هيك سؤال تافه, بدك تسكن بتل ابيب, بدك تبيع كل من كلسون ابوك, كلوته الشمال واليسار واليمين , وممكن تضطر تبيع اطفالك ع شكل سائل شهريا لدفع الارنونة)



انا و انا صغير, كنت افكر الدنيا بالصبابا, وانه كل الناس خير وبرتشي (بركة) وانه الازمة الوحيدة بهاي الدولة, هي انها مش دولة! غير هيك كل شي صبابا وعلى كيفك!
اتارييني كاين حماااااار!

بدأت معاناتي منذ شهر تقريبا, وجدت نفسي مرميا من السكن الطلابي, لاجل عربيتي, هكذا ادعت بعض الجهات الطلابية, وبما انني اخطط مخططا فاشلا للبقاء في تل الهفى, الربيع او الافيف, وجدت نفسي مضطرا للبحث عن مسكن في درجة الهفى, الربيع او افيف (رمات افيف)!
حلوة الفصحة بتعطي الموضوع طابع جدي درامي تراجيدي (لقد قتل حمزة يا رجاااال), لدرجة انه بلشت ابكي على حالي!
المهم, بلشت مسيرة البحث عن مسكن, وصار طابع تصفحي للشبكة العنكبوتية محصور بالمواقع التالية:
*موقع شبكة الميلان العربية: مهو مع دار ولا بدون دار, كرة القدم اشي جوهري
*موقع العرب: بركي جابه خبر شيري ايريسون وريحونا عاد (شيري ايريسون هي الي اشترت المعونوت)
*موقع يد ثانية: ع اساس غاد بحطو ايدين ثانية, قصدي ديروت للاجار!
*موقع هوم ليس: يعني مشرد, بما انه اسمه بوصف وضعي الافتراضي بشهر 10!
موقع وين وين: اسمه لزيز, وبحطه فيه ديروت انباعت قبل 7 اشهر!
موقع الخارطة الجوجلية: عشان اعرف انا وين, بلا ما نضيع!
المهم بتفوت بتشوف الديروت واسعارها, بتعرف لي مصمص فش فيها شوارع مزفتة و ممرات مشاة, بينما برمات ابيب, قسما برب الفلق, انه يوميا كانو يزفتو الشارع المقابل لماعوني, وبتعرف لي البسس برمات افيف محترمة راقية واذا شافت سطل زبالة ما بتنهزلها شعرة, بينما قطط بلدك شوارعية سافلة جشعة, بتعرف لي زقزقة العصفور برمات افيف مزقزِقة بينما ببلدك بتحس انه العصفور صوته جورج وسوف لانه مشحط من شغل العماار الي بشتغله كل يوم, واخيرا بتعرف لي الكلسون ببلدك ال3 ب 10 وبرمات افيف الواحد ب 70 (للتمحيص بالموضوع ابحث: القيمة الكلسونية)!
اقل ديرا بتشلحك وبتخليك تبيع رئاتك وتنضم لبرنامج النفط مقابل الغذاء, قصدي التشلح مقابل المأوى!
اول ما تبلش تدور على ديرا بكون عندك الشروط التالية:
1)     شقة 3 غرف وصالون, كل شخص بغرفة!
2)     مكيف هواء بكل غرفة, لانه لما الله قرر يفتح فرع لجهنم عند شعبه المختار, فتحة بتل ابيب, وفتح طي**نا معه J
3)     تكون الشقة بعيدة عن الجامعة 10 دقائق مشي بالكثير, اصله انت خلقة وانت بالمعونوت كنت تقلل خواص تزور الجامعة وهي بعيدة 5 دقائق, ف 10 دقائق كثير, بس لانك مضحي وبدك تصير انسان افضل ف معلش!
4)     يكون شكل الشقة مقبول, انه كيف ما بقولو بالشامي, "مستورة"!
5)     اذا بكون عندك جارات شقف بكون افضلية!
بمرق جمعة لتصفحك لمواقع الشقق بتلاقي حالك عم تتصل على شقة غرفتين و نص صالون, ومعك كمان 3 شركا مش شرط بتعرفهم , والشقة صاحبها اشكرا كاتب انه هي مش ولا بد يعني, وبعيدة عن الجامعة نص ساعة مشي سريع! :) وفش فيها مزجنيم, وصاحبك بقلك "مالها الهوّاي انا عندي بالبيت هوّاي مع شلاط وبتلف وفي عليها درجة حرارة!" (انه انحلت مشكلة الحم بهيك هوّاي شالخة ابو دين التكنلوجيا)
فبتخلع رقم (ايلون) صاحب الشقة ع تيليفونك الي صار زي الزانية قد ما عملت في ارقام, اسا بهاي المرحلة عند نصيحة:
ذاكرين وانتو صغار علموكو حرف اسمه "حااا" ؟؟ بتنسو شيلي من قاموسكو بتلفوناتكو مع اصحاب الديروت, واذا عملتلك شي اعاقة بلسانك وصرت تقول ال "راا" "غاا" بكون بيرفيكت!
انه لو صباح فخري كان يدور عشقة بتل ابيب بشي مرحلة بحياته كان سمعنا صدح وقال "خمغتة الخوبـــي اسقينيهاااا", بسيدر خابيبـــي؟؟؟؟ قصدي وصلت الفكرة؟؟
فش حاجة اشرح السبب, وانك عربي, فاذا انت عربي, فمشاعر الي ساكنين بالبناية رح تتأذى كتير بوجودك, حتى لو التزمت الصمت حتى اشعار اخر, وهو برضه احنا ما بنقصر بالشقق الي بنسكن فيها,  انه قبل ما يفوت العربي عل ديرا بتكون فرضا مدهونة اصفر، بعد ما يسكن بتكون قالبة قوس قزح, مع فتافيت بوسترات وطنية ودعارية على حد سواء.
يا عمي حتى بتفرق بعدد حيطان الديرا بعد ما يستلموها عربك, لشو الحكي, منا عادد حيطان ديروت!
المهم, بتتصل لايلون او موشي او يوسي صحاب الديرا, اسا اكتشفت انا شغلة بالمجتمع الاسرائيلي, انه فش عندهن شغلة:
الاول: مرحبا
الثاني: اهليــن!
انه بتصله, بقولو بكل نغاشة وخفة دم "شالووووم", مع شدة على ال "ل" لتثبت انك طيوب وحبوب وبشوش, بس هات عاد يرد عليك ويقلك اشي, انه بسكت شي 10 ثواني (وانت بهل 10 ثواني بتفوت بتوتر شديد, انه يا الله شو عملتلو, ماله اتصدم و فات فيو تراك) وبالاخر بفهم انه انت بتستنى منه "شالووم" فبقولها بدون نفس , اسا وينتا انا بكيف, لما اشوف شقة مع اسم صاحبها, برتاح من ال 10 ثواني الغير مريحة لما اتصل لانه ساعتها بقول "شالووووووم, ميدابيــغ غيم تسفيكا؟؟" فساعتها بتكون كسرت الجليد و برد عليك بنعم او لا! بعدين بتقله"اكتواالي؟؟" (يعني الديرا بعدها للبيع) قلك ااه بتكمل!
اسا برضه باقي المكالمة غريبة شوي, انه بسبب عصر الانترنت, كل معلومات الديرا مكتوبة قبالك, حتى اذا فيها فرشاية مرحاض بكون مكتوب (مبالغة!) فبتبلش تسأله و بتستهبل حالك لانه الاجوبة قدامك! وهو يا يتماشى مع هبلاتك, يا انه بحط حد للمهزلة وبقلك "ها كول كاتوف ليفانيخا بااتار", وبتستمر المكالمة, لغاية ما تعينه موعد! (طبعا نسبة انك تصل لهاي المرحلة اقل من 11%)!
بعد هاي المرحلة, نسبة النجاح واطية جدا, انه بتروح فما بعجبو شكلك او بحس بعروبتك او بستنى ييجي واحد اأسرل منك ووطني اكثر منك J, هيك اشي.
لكن فرضا نجحت فعندك موضوع مهم وهو
الضرائب:
1)     ضريبة ارونونا: بقولكم بدولة صهيون الاولى كانه الوزراء قاعدين قعدة, فنط واحد عن مزح بقول "شو في اشي بعدنا مش مدفعين الناس عنه؟" فنط الوزير ارنون وقال" على الولا اشي, امشوا ندفع الناس على الولا اشي", فسميت هذه الضريبة باسمه ارنونا! (حكمة)
2)     ضريبة ماعم:انه ممكن تصل سخرية القدر, انه تدفع عن ارباح الي مسكنك عنده, ونِعمَ الرأسمالية
3)     ضريبة العروبة: بجيك صاحب الدار وبقلك "بما انك عربي, بدي ادفعك اكم شيكل زيادة, لانه انتم صعب تلاقوا ديروت"
صراحة افكاري تشتت, وبرضه مضيت "حوزي", فباركولي واضحكوا منيح وباي  (بتركم مع اغنية كانت طوال الفترة السابقة معبرة جدا عن وضعي, زياد وابداعه) J


17‏/11‏/2010

قصاصات ورق - الحلقة الاولى - عزيز بركات ومفهوم الحب


  • قصاصات ورق هي سلسلة مواضيع لم تنقح ولم اجد التوليفة الكاملة للموضوع, هي مواضيع جَنينية غير مكتملة الكتابة, لكنها تستحق النشر برأيي لذا اقدمها بسلسلة خاصة "قصاصات ورق"!

في كل معادلات الحب, الافضل ان تبحث عن نقض للمعادلة, على ان تحاول ايجاد الجواب!

لكن المشكلة في هذه النظرة, هي ان استحالة النقض توازي استحالة الجواب, فنقض الحب هو بحد ذاته نقض للذات!

بعد بحث مطول وتفكير عميق اخرجت خلاله الحب من القالب الدارج وحللته بحيادية بحتة وبدون افكار مسبقة وحالات افتراضية, خرجت بنظرية لحل المشكلة, الا وهي الالحادية العشقية, اي الايمان بالحب كما هو بدون اضافات و اساطير, النظر للحب كفعل ورد فعل تماما كالسلام ورد السلام, وعدم النظر اليه "بعقدية" زائدة لا طائل منها!

 الحب, ليس احساسا مقدسا يصيب ارواحنا بدون سبب ودوافع, وكانه يوجد "كيوبيد" يلقي باسهم الحب بعشوائية وعدم نظام, ومتى ما اصابك زرع السهم في اعماق نفسك, وتعذر عليك نزعه بسهولة!

الحب كيمياء ممزوجة بعلم الرياضيات و"القليل" من المنطق. كيميائية الحب اثبتت ولا تزال تثبت في كثير من الابحاث المتواصلة عن هذا البارادوكس المسمى حب وتجاذب وعواطف! الرياضيات في الحب, هي ما نميل لتسميته "التعقل-العقل...", وهو عبارة عن حساب احتمالية حدوث العلاقة,حساب نجاعتها وطبعًا حساب الفوائد والمصالح المحققة منها ان كانت نفسية مادية جنسية او حتى حسابات سلطوية سياسية!

معادلة الحب هي جمع حاصل ضرب كل من (الكيمياء, الاحتمالية, النجاعة, الفوائد) بمعامل خاص!
قيمة المعاملات تنبع من الكيمياء الشخصية لكل انسان, ومن المنطق الذي يتخذه بوصلة في حياته!

لذلك نرى التنوعية الكبيرة بالحب, فلكل معاملاته الخاصة لفك رموز معادلة الحب, ممكن ان يصل التطرف في تنوع المعاملات ليصل ان يكون المعامل سالبا, فمثلا لنفرض اني انسان يعشق التحديات والتميز, لذلك ترى معامل الاحتمالية سالب, اي كلما زادت الاحتمالية لحدوث العلاقة, قلت حظوظ الفتاة بحبي لها, والعكس صحيح!

وايضا من هنا تنبع البارادوكسية العشقية, اي ان يبدو لك حب شخص ما غير مقبول, مع انه نابع من فرضيات مقبولة ربطت بروابط مقبولة!

الخلاصة, الحب معادلة, مفاتيح حلها بين يديك, من خلال المنطق الذي تتخذه تستطيع تغيير المعاملات, وبالتالي تحويل الحب الى ال لا حب, وبهذا حلت المشكلة, ووجدنا البارادوكس المفقود!