19‏/11‏/2011

الإحتمالات

1) لو دمجنا نظرية علم الاحتمالات المسماة بالتوزيع الطبيعي, مع 7 مليارد انسان على وجه الكرة الارضية مع انحراف مقدر باكم مليون, بنتج عنا كثير شغلات, اهمها انه في زيك مليون, وزييها وزيو!
2) لو اخذنا نصيحة دكتور "كوكس" ل "جي دي" بانه: علم الاحتمالات لا ينطبق على الفرد!
3) لو فرضنا انه العلوم اشي مدروس وضروري وعام!
4) وفرضنا انك مفكر انك مش عادي, او هي مش عادية!
5) وفرضنا انك متمكن من المنطق!

لوجدنا انك تايه توها اخت عرص {حكمة}

بس مش عـادي...

09‏/11‏/2011

السوبارو هي الحل

المشهد:
انا بزقاقات ام الفحم.
السيارة: سوبارو مستطيل (DL) فاخرة بيضاء اللون مع اضافات عصرية باللون البني الضارب للخضار بفضل الحمام والعصافير, لزقة اعين غاضبة تدل على سخط السيارة على الشارع وجبروتها, والموديل 92!
الطقس: في بالسنة 365, هاذ اليوم من افضل 5 ايام من ناحية الطقس, الطقس الي بتحس بالهوا وانت تتنفسه, معتدل مع شوية غيوم  كافية لاطلاق العنان للخيال وقتما شئت, بالعربي "اخو منقوشة"!
العدة: علبة سجائر "جلواز احمر" ب 15 شيكل, وراديو!

الاحساس: بعد جمعتين من الضغط المخيف, وصولا الى انه احس اني بطريقي لانهيار عصبي, وقفت عل برندة وقلت لازمها سوبارو!
الاحساس صعب وصفه, لكنه بتلخص انه يلعن ابو الحياة, فش حاجة لاشي اكثر من سوبارو وعلبة سجائر ارخص نوع وراديو عشان انبسط!
بلا نط من هوا ملاهي او مطاعم, بلا انطاليا ايطاليا او حتى كمبوديا(ناااار كمبوديا), السوبارو هي الحل!
نزلت عل سيارة, اكتشفت اني ناسي المفاتيح, طلت قشة سنان ودورت السيارة (الاشي واقعي, مش خيال علمي*), شوية فن فن, وتسهلت, ايدي وراسي بريت الشباك, السيجارة بالايد الثانية, وهزة راس خفيفة تلائما مع الجو!
والذ اشي بالموضوع, الراديو المعفن, راديو ما بشتغل الا اذا شغلت اللامبات (اشي منيح لما يكون قانون اللامبات فعّال)!
راديو مش من الي بسمعك المحطة, لا, بسمعك 70% غباش, 10% من محطة ثانية, و20% من المحطة الي بدك تسمعها!
الاغاني الي كانت شغالة, هي اغاني زمان نسيتها, بما اني صرت ضد الاغاني التجارية التافهة, بس الحق يقال, انه انرسمت على وجهي بسمة طويلة(بدل عريضة :P ), اغاني تجارية بس عتيقة شوي شغل ال 2006-2007 هيك اشي, بحبك وبتحبيني وحبينا "بعض" بس بعض طلع ملتزم, ااه يا ليل و يا عين ويا ذان!
اكوام مكومة من التفاهة, بس بعرفش ليش, كنت مشتاقلها وقتها, وطول الطريق وانا مشغل "غباش+اغاني تجارية"!
شغلة ربع نص ساعة, وبتكون اخذت جرعتك الكافية من السوبارو, فينجر عل يسار, التفاف (حذوة حصان) وعل دار, فش حاجة لترجيع مفاتيح, فش حاجة لتقفيل السيارة, ببساطة برجع وين كنت عل برندة, بس حاليا, انا مع جرعة سوبارو!

زي النمــــر

وبنرجع وبنقول "كل دار لازمها (محاشيف)", قصدي "السوبارو هي الحل"!

14‏/08‏/2011

في منتهى الرمزية...


القائد الرمز, مظاهرة بناء جدار وهدم رمزي له ولما يمثل, رمزية الموت بالشارع او على الرصيف, رمزية الحب القيس ليلوي!
 رمز هنا ورمز هناك, رمز رمز رمز!!!

في شعوب الشرق, تعيش الرمزية, فوجودها رمزي لاسباب غير مفهومة, واذا فُهِمَت فهي لتكون رمزا!

حتى هاي الختيارة, اسمها رمزية

03‏/08‏/2011

هو قال, هي قالت...

ملاحظة: هاي الاحاديث والرسائل لا علاقة لها بالواقع, واي تشابه بين الشخصيات وشخصيات حقيقية ممكن يكون صدفة!


# اول جمعة عرفوا بعض:
(رسالتها)-بس لمعلوماتك, مرات بشتقلك بطلع ع صورتنا وبنام!
(رسالته)-وانا الي كنت مستحي اقول اني بعمل نفس الشغلة!

# بعد 6 اشهر
-محيت صورنا؟
-مممم, لا, انه الصور حلوات كتير, حرام ينمحوا!
-صاااااااااح؟؟؟!! :)
------------------------------------------------------
# اول موعد غرامي
-بلا ما نحدد شو الاشي الي عم بصير!
-اه, بنمشي كيف حاسين!

#اخر يوم غرامي
-حياتي شو المشكلة؟
-ولا اشي
-ايش في؟
-إنت
-مالي انا؟
-بتحس كتير!
-------------------------------------------------------
#بشي محل ع شط البحر
-البحر حلو...والبحر بخوف
-البحر حلو لانه بخوف؟ ولا بخوف لانه حلو!؟
-حاجة فلسفة وبوسني!
-إنت "حلوة"
-------------------------------------------------------
#سألها
-انا شو بحب؟
قالتله كتير شغلات, ونسيت تقله انه بحبّها!


16‏/07‏/2011

عياط ع جاليليو (لقيت الفيديو)

كان في مشكلة بموضوع "عياط ع جاليليو", انه الفيديو الاساسي الي بحكي عنه الموضوع كان ممحي من ال يو طيوّب!
بس جديد رجعت لقيت الفيديو وزبطت الموضوع, الي بحب يطلع عليه كمان مرة, او قرأه بدون ما يحضر الفيديو, او مفلس, او زهقان!
يعنــي.....


06‏/07‏/2011

بحاجة للافق...

(هذا الموضوع بالتعاون مع مدونة غربة :P)
(مع انه المشاعر بالعامية, بس هاي محاولة فصيحة :P)

قال:
كم يلزمك من الوقت لتعودي من طوفانك ؟؟
كم يلزمك من الخمر لتسرعي خطاك نحو ذاتك؟؟
وكم يلزمك من النسيان لتعودي لحياتك السابقة؟؟
كم من العمر يلزمك لتقولي للموت لا؟
فانت قادرةٌ على أن تحبي

قالت:
حين ينفخ في الصور اسرافيل
حين ارى الافق بلا نهاية
بلا شواطىء بلا ميناء
اراك تذوق العذاب لوعة وتنسى
وتكتب...كي تنسى
وتنسى...

قال:
للافق عيناي بصيرتان...
مع شعرك الاسود لا احتاج للميناءِ
ايضا...
مع بكائك ضحكا لا احتاج للقصص الاسطوريةِ
ايضا...
معك لا احتاج
الا انت
ومن الحب القليل الكثير
ايضا...

عهدتي ما عهدتي
واليوم اضحيتُ
شاطىء بلا ذكرى
وميناء لن تصليه
وايضا...

ففيضي واخمري وانسي...او موتي
فانا ايضا...بحاجة للافق



03‏/07‏/2011

مؤتمر ميـن سمير؟ ونتائجه!


نتائج المؤتمر الاول ل "مين سمير؟"...تم عرض ثلاث نظريات مؤامرة ممكنة للقضية:
1) السفير السوري في المؤتمر, ادعى ان قضية مين سمير, هي مؤامرة تحاك في المطبخ السياسي في واشنطن, لزعزعة الاقتصاد في منطقة الشرق الاوسط وبالتالي ارتفاع اسعار الدولار, وعودة العربدة الامريكية!
2) سفير المحششين والنوايا الحسنة, ادعى ان "صمير" هو الاب البيلوجي لعشيق ماريا مرسيدس بجزءه الثاني!
 ‎3) اما اخر الطروحات عن القضية, فقد كان مندوب اقرأ في المؤتمر "علي الحاج" , وادعى ان على سمير الاجابة على الاسئلة الخمسة في مقاله, لتحديد موقف منه!


البيان الختامي للمؤتمر:
"ميـــن سمير؟؟"


01‏/07‏/2011

مين انت؟


مين انت... يلي رح تضحكي على كل نكتي, البايخة منها, والي كتير بايخة, بس لانها نكتي وبتضحكك!
مين انت... يلي وانا نايم الصبح ومتكعنش بتختك رح تبوسيني بوسة ع خدي, وتفيقيني ع فطور انت عاملتي, مش انه احلامي شرقية, صباحيات كتيرة انا الي رح ابوسك ع خدك واعمل فطورنا!
مين انت... يلي رح تحبي الرواق معي وزيي, ونعيش الرواق برواق, بس بلا ما نميل ع بعض ع رواق, لانه "بعض" استشهد بالعراق!
مين انت... يلي رح تضيعيني, تضيعيني بكل اشي صغير فيكي, انت يلي فيكي رح اضيع والاقي حالي!
مين انت... يلي رح توخديني, طفل وانا بحضنك, رجل وانا حدك (و بتختك), او شي ختيار بقلقي عليكي او لما اتفلسف ع شي قهوة على زاوية الطريق!
مين انت... يلي رح ترجعيلي الثقة, يلي رح ترجعيلي ايماني انه في اشي بستاهل!
مين انت... يلي رح ترجعيلي ايماني, انه ممكن نكون "الاسطورة", وانه في محل للقصص الخيالية بعالمنا الخاص!
مين انت... يلي معك رح اكتب اكثر بمدونتي, اعيش اكثر واحب اكثر!
مين انت... يلي رح تخليني احب اني حاسس, ونكون كتير حاسين, وماشيين كيف حاسين, لانه بكره لما اكون مش حاسس!
مين انت... الي لما اكون انا باول شارع وانت باخره, مش عنجد رح تطيقي تستني نمشي تلا بعض, ورح تركضي تلاي ولا كانه في حدا غيرنا بالعالم, هيك زي شي فيلم, مش لانه بنحب الافلام, بس لانه هيك حاسين!
مين انت... يلي كل ما تشوفيني, رح يوقف الوقت عندك وتعيشيني, وانا يوقف وقتي واعيش اللحظة معك, اي لحظة!
مين انت... يلي ضحكتك رح تمليلي حياتي, وكل ما تضحكيها, يصير العالم الي حولي رسمة ثابتة, وانت الاشي الوحيد الي بتحرك فيها!
مين انت... يلي عنجد رح تحيريني بسؤال "مين الي بحب التاني اكتر", ومش عنجد رح نلاقي حل, لانه مقارنة اللا نهائيات صعبة!
مين انت... يلي عشانك رح اتعلم دبكة وسالسا وتانغو, بس بالاخر الرقصة الوحيدة الي رح ارقصها هي رقصتنا انا وياكي, وبس رقصتنا!
مين انت... هل انت حولي وانا مش شايفك؟ او شايفك بس انت مش حولي؟ هل انت بعيدة؟ او ممكن مش موجودة حتى!
بلاش تكوني شي رسمة بشي خيال, مين انت؟؟؟

 الرقصة الوحيدة الي رح ارقصها هي رقصتنا انا وياكي




24‏/06‏/2011

الاغاني الحزينة


اشي كتير عاطل, انه الفراغات الي كنت تعبيها بكلمات الاغاني, باسم, بذكرى او صفات من حبيبتك, تفضى!
تفضى, لانك مش حاسس انه الي مرقوا على هل فراغات شي مرة, حاليا بستاهلوها!
تفضى لانك بهاي اللحظة, ملان بالحب, بس فاضي منه!
يافا, بتضل يافا, سلمى وليلى يضلوا سلمى وليلى, الاماكن, تكون كلمة, مش اماكن مجسدة بخيالك!
كتير عاطل, انه كلمات الاغاني صارت كلمات اغاني وبس, وبراسك بطل يمرق شريط احداث مضى!
اشي حزين, انه ما تقدر تحزن على شي حبيبة مرقت ع شي اغنية عاطفية حزينة!
اشي حزين انك تحزن, بس اشي احزن انه ما تقدر تحزن!
"بشوفك في البلد", "ارى سلمى", "الاماكن-محمد عبده": على الترتيب!

*اغنية كانت حزينة, صارت مجرد كلمات والحان جميلة*

23‏/06‏/2011

السيجارة ال19

حرقت السيجارة ال 19 لليوم...بعترف...مكنش عندي غير هل فكرة عشان ابلش اكتب...واسا خلصت الفكرة!
وضليت بدون فكرة...بس واقع اني بدون فكرة...هو فكرة عبقرية بحد ذاتها!
الانسان مش ممكن يكون لدقيقة فش عنده فكرة, بس ممكن كتير انه دفاعاته النفسية شغالة على قدم وساق حتى تدفن كل افكاره!
دفين افكاري, اشياء مزعجة, بضل ادفن فيها, ادفن فيها, بس شي مرة رح تخلص الجورة, وتتملا وتبلش تفيض, وكل فكرة بتمسك معها اختها الفكرة الثانية, فبحدث انفجار!
فحذاري من انفجاري (كيف الدرويشيات معي)!
مش عارف دفني لافكاري, هو ممارسة صحية لتطوير شخصيتي وعدم الانجرار وراء صغائر الامور, او اني دَفّين ماهر, دَفّين دفين بحالة انسانية غير حالته!
السؤال الي بطرح نفسه متفعفلا على الارض ويتدحرج قائلا: هل هيك حالة هي ممارسة اغتصابية لشخصيتي الحقيقية؟
 انه اذا الفكرة فكرتي, فما في سبب ادفنها, والا بكون تعدي على الانا اللحظي الي بهديك اللحظة!
خلاصته, قبل ما انجن, بدي انجن!
وحذاري, حذاري من انفجاري :P


17‏/06‏/2011

عل اغلب بتعرفيش


عل اغلب بتعرفيش, بس انا ميت فيكي!
عل اغلب بتكرهيني, ما بطيقيني, او ممكن بمرقش ع بالك ابدا, بس في بالي زمان بنيتلك عرزال!
عل اغلب القلب ما يرجف على اسمي, انت حروفك دقات قلبي, قلبي الي معاكِ ضلي!
عل اغلب مفكرتيني منيك, بس انا مش هيك!        
عل اغلب مفكرة انك عندي زي كل البنات, بلا ما تفكري هيك!
عل اغلب مفكرتيني علقان بالماضي, انا علقان بفكرة انه انت الحاضر والمستقبل ولمحات من ماضي جميل!
عل اغلب بتقولي الحق عليك, ممكن, بس القدر وتدخلات الاله وتبعات الماضي عليها الحق الاكبر!
عل اغلب جرحتك (اذا كنت افرق معاكي), جرحت حالي قبل ما اجرحك!
عل اغلب بتقولي عني جبان, مزبوط, انت اول انسانة بوقف قدامها وبضيعوا مني كل كلماتي!
عل اغلب مش من حقي احكي هاد الحكي, ولا احط عيني بعينك, معلش هاي النفضة الاخيرة!
عل اغلب انت "الوحدة", بعرفش بس عل اقل هيك انا مفكر!
عل اغلب عزيز مرقة كتب هاي الاغنية وهو حاسس ب"الاغلبية" الي فوق, عل اغلب!

13‏/06‏/2011

لشو التغيير بهل بلد؟(بشوفك في البلد)



(اول اشي اسمعوا الاغنية :-] )


لشو التغيير بهل بلد؟ ااه؟!

انه ماله لو النسوان تضل تحيك, وبلا ما تخلص الكنزة!
ماله لو شباب البلد, بعدها شباب البلد, نفس القصص والحكايات, وماله اذا حسيت انه بالبلد وقف الوقت, مالها "النترلة", ماله اذا كل واحد بعده واقف محله, لا كتاب جديد عل مكتبة (غير "كتاب الرائد" المتناقل من ابن العم لابن الخال طبعا) ولا فكرة جديدة بتمرق براسهن (ممكن فكرة نكاح جديدة, بس حتى بهاي: الطريقة ذاتها بس البنت الجديدة جديدة عل فكرة), حتى رؤوس الارجيلة هي ذاتها, مع نفس سواد المعسل والكسر الي على جنب, حتى خشونة الايدين الكادحة هي نفسها!


ماله لو ما في طفولة بالبلد, مع انها بتفيض طفولة شمال يمين, انه خلي الطفل يستطفل بالشارع بلا ولا شي, يسرق مشمشات الحج نادر ويهرب, يقفز ويلف بكل زقاقات البلد بلا جزمة باجره, لعل وعسى تعلم قسوة هل حياة من زفتة الشارع, بلا ما يتعلمها من زفت الحياة!
وماله لو في البلد, بين كل دبة(طبة-مطب) ودبة في نتوفة شارع, انه لعل وعسى مع الزمن السيارات في البلد بتتعلم وبتتعود عل نط, عشان يوم الزحف الكبير انط بالسيارات فوق الحدود!


وماله اذا بالبلد باعوا الدنيا وما فيها, وفاتوا بحالة اتحاد رهيب مع اللا شي, وسلموا امورهم للقدر والقضاء, انه عل قليلة "متأملين خير" و "ان شاء الله" هي كلمة المفتاح...


وماله انه كل ما اسمع "بشوفك في البلد", اخر بلد ممكن اغير اسم يافا لاسمها هي بلدي انا, واذا بالغلط طلع شي بنت بهل بلد, فالاغنية بتكون "بشوفك بشي عزلة قريبة عل بلد"!!

وماله اذا بالبلد, بتحس الذكور من كوكب والاناث من كوكب, وطريقة التواصل الوحيدة بين الشباب والصبايا هي اصوات تفحيط عجال السيارة وزماميرها, انه مش غلط, عل قليلي بتواصلوا!

وماله لو زلام هل بلد اتفقوا انه ما يتفقوا, بس بنفس الوقت, اتفقوا ع انهم الادرى بمصلحتك وكيف حياتك تكون, واتفقوا ينعلوا سلسبيل سيرتك كل ما يسير في غموض حولين حياتك في البلاد البعيدة, وماله مش غلط, بركي على جثتي بتعلموا يتفقوا بالنهاية بشغلات اكبر مثلا, بتفقوا انه يكون مكتبة بالبلد هو ضرورة مثلا, مش مزينات او كماليات, بركي بيتفقوا على الجدار الى ماكل نص الشارع ونص ارض الجار, بركي اتفقوا على انه القضية مش فيهن, وانه القضية بالبلد!

\\مش غلط, مش غلط انه بالبلد ربطة الخبز ال 20 ب 10, وقنينة الكولا بعدها ب 6 شيكل, والقهوة بعدها بتستنى ع برندة دار سيدي باي وقت, وستك بعدها نبع حنان بالزبط زي قبل 20 سنة, وسيدك قد ما يعصب بتغدر تسرق منه ضحكة من القلب. وانه هوا البلد غير, وانه قد ما تغيب محلك محفور بقلوب عيلتك وصحابك, \\مش غلط انه هالبلد بعدها بلد, او ممكن غلط, مش عارف!

بس الي بعرفه انه انا بعدني نفس الاشي بهل تيار الجارف بالبلد, انه قد ما استقويت, مش رح اغير هل بلد, واكبر معجزة ممكن اعملها, انه هل بلد ما تغيرني, وما تسترجعني من ارض الغير مباح بالقوة والجذب وترجع تقوقعني بالزبط كيف ما بدها اياني, شي رقم بتعداد ال 5000 نسمة الي بالبلد!


أنا والقهوة والبلد

03‏/06‏/2011

اتعلم الثقة!

كثيرة هي مشاكلي مع الثقة, حياتي القصيرة كانت ملاني بطعنات الظهر عشتها او شفتها بعيني او حتى سمعتها, اصلا الحياة هي اكبر مدرسة لعدم الثقة!
عدم ثقتي باي اشي بالدنيا, تشكيكي بكل شغلة, حتى خضار اللون الاخضر مثلا, بدأت كثير تتعبني بحياتي, دخت بين 4 حيطان, حسيت حالي عم بفقد انسانيتي بشي زاوية عل طريق, وعم بتحول لشي ماكنة مبرمجة!
ولانه الانسان هو افضل بسيخولوج لنفسه, فقعدت مع حالي قعدة رجل واحد, وتأملت بالدنيا, تأملت بالناس, بتصرفاتهن, بثقتهم بالانسان!
بالنهاية استنتجت, طلعت بالحل, لقيت كبسة "تفعيل الثقة",  لقيت مفتاح صندوق بانادورا!
لقيت انه الانسان بحاجة عل اقل لحد ادنى من الناس الي يثق فيها, والا فقد انسانيته.
وبما اني اخترت الحد الادنى وهو شخص واحد كعدد الموثوق فيهم, وبما انه عندي مشكلة مع مبدأ الثقة او الكلمة, قررت اسمي ثقتي بشخص واحد ووحيد باسم "ايمان", كل واحد فينا بحتاج يأمن باشي, مهما كان انسان جبار, بالنهاية رح ينكسر بدون ايمان باشي واحد عل اقل, وبما انه مش رح اؤمن بقصص خيالية وشخصيات مخترعة, فقررت أؤمن بشخص واحد ووحيد, والشخص هاد هو الانسانة الي بحبها, هي ايماني بمعنى البشرية وايماني بالصح والغلط, ايماني انه الحياة بتستاهل, ايماني بانها اهل للثقة!
هل ممكن ايماني فاشل, هل ممكن انه مش بمحله؟  ممكن!
والالم الي رح يحصلي؟ مستعد ادفعه بسرور! (I'll pay it gladly)

واخيرا لقيت الثقة, كان كثير متأخر بس اتعلمتها!   اسا الوقت الاقي البنتJ



فصل الختام, بترككم مع مقطع من فيلم "Equilibrium", فيلم بحكي قصة ليبريا, دولة قامت على انقاض العالم بعد الحرب العالمية الثالثة, البشر عرفوا انه اذا صار حرب عالمية رابعة, فالبشرية رح تهلك, لذلك بخترعوا دوا بقيم المشاعر من البشر, فاول الفيلم بدور حديث بين بريستون (البطل) وصاحبه, وبعدها بقتله لانه عنده مشاعر, فهذا الحديث الي دار بينهم قبل ما يقتله:

John Preston: There's no war. No murder.
Partridge: What is it you think we do?
John Preston: No. You've been with me, you've seen how it can be - the jealousy, rage.
Partridge: A heavy cost. I pay it gladly. 


وهذا مقطع نهاية الفيلم:



بنصحكم تحضروا الفيلم, فيلم رائع :)

24‏/04‏/2011

الكلاسين ورايات النصر

بعد تفتيش اعتيادي و"عشوائي" في محطة الباصات المركزية
بقول للشرطي باللغة العبرية: بتعرف شو احلى اللحظات خلال تفتيشك الي؟
بقلي: شو؟
بقله: انه مش بس سليتني وانا اتمسطل عليك بهل 10 دقايق بدل ما افلس وانا استنى الباص, وكمان مرمغت ايديك بكلساتي وكلاسيني المعفنة!
فاذبهل منقهراً, وذهب في حال سبيله, ورفعت كلاسيني اولى رايات النصر في صراعنا الدائم! :) :)






 قيمة الكلسون مش بكبره, انما بقدي عدد رجال الشرطة
 الي مرمغوا ايديهن فيه خلال تفتيشك

09‏/01‏/2011

حصاد العام: افضل ستاتوساتي 2010


Category 1-

·        ضايع بين دبلجة الكلام وفهم المعاني, بس من هون لحد ما التقي انا وحالي من جديد, حبيت اسجل وجود, بلا فهم المضامين ومحتلناتها, وجود ذاتي محض!
·        قليل من المطر, يشفي قلب الانسان...
·        بعجبني مزاجك الفكري المحدود, لانه كوميديتي المفضلة!
·        Defect in the photo, is an art in general :)
·        حسب رأيي, اذكى حركة اتخذتها اسرائيل لتثبيت اقدامها في المنطقة, واحتذت بها امريكا بعد ذلك في باقي صراعات المتوسط, هي دعم التيار الاسلامي, واسلمة النضال الوطني, بذلك شرعنت الصراعات الدائرة, على انها صراعات ايدلوجية دينية, لها تاريخ بعيد ولن تنتهي, لا على انها صراعات مقاومة ضد احتلال استعماري رأسمالي بحت, وبذلك رميت الازهار لهما شمالا ويمينا لصراعهم "المشروع" على الساحة الدولية...فعلا انزل لهم القبعة من حيث التكتيك!
  • دايما رح يضل الجيل الصاعد اخلاقه مخزية انما الجيل السابق كان جيل خلوق, والاسعار بالزمنات كانت بكثير اكثر معقولة بينما اسعار اليوم مش طبيعية, دايما رح يضل زمان زمن الشرفاء وهاد الزمن زمن الاوغاد, بس بالنهاية باللفة الجاي للجيل, رح يصير الجيل الصاعد حاليا جيل خلوق, واسعار ايامنا معقولة, والجيل السابق حاليا تاريخ كتب منسي!


Category 2-

·        ستاتوس عامل حالو ستاتوس :D :P
·        قُل ربّي زدني بطشًا! :)
·        الاول من نيسان, فبحب ابشركم انه: فلسطين تحررت, وكل الدول العربية صارت دولة وحدة علمانية, وصار في عملة عربية موحدة اسمها العولر, وبقدرة القادر  انتصرنا على المشروع الامريكي في المنطقة, وتم اطلاق مكوك "عرب-ستار" للمريخ, وبالنسبة لالي شخصيا فعم بكمل دراساتي بالازهر الشريف!!!
·        لو شاافك دارويـــن وفر وقت الله...\
·        كل هل فص, على هل خرية ؟!!!!!!!!!
·        مجرد التفكير في النوم بعد ما تصحى الصبح...بشلخ ابو دينك وبجبرك ترجع تنام! الخلاصة بدي ارجع انام, مالني ومال المداومة الصباحية انا!
·        i just wanted to say to you \"go fuck your-self, so you get pregnant of your-self, so there will be 2 of you, i kill the first, and make the second watch, then make him do the same as you!\"
·        شو مع انه الكرة الارضية تشتغل محل الشمس بهلمجرة مثلا؟؟؟.....حريقة العادي
·        في الباص: من راقب الشارع مات زهقًا في الفيسبوك: من راقب بروفايلات الناس مات همًا في البيت: من راقب التلفزيون, \"נראה לי\" انه هو ميت اصلا
·        صايم صوم اداري!
·        ولله يا رفيق, الحياة مسخرة, وانت بطلها! :)
·          لو كانت الجامعة رجلاً, لقتلته! :)
·        ميلا فنسة لما البرق يكون اشي اخو فلااتة والرعد يطلع اشي فاشل !!



03‏/01‏/2011

مقطوعة ليلية: لو كنت الها, العربوش وكلام اخر الليل!

كلام اخر الليل
خديني, ضيعيني, طيريني والقفيني او ما تلقفيني, مش عارف شو حاسس, بس عل اقل احسن من انه ما احس, غير انه الوقت عم بمشي بسرعة, والشعور العام ايجابي, والخاص ايجابي اكثر!
 ضايع بعيونك, من دون ما افهم كل سطور الترجمة, ضايع بابتسامتك, بشفايفك كانت او بعنيكي! مع هيك حاسس اني فاهم, او عل اقل حاسس اني فاهم اكتر واحد! هيك حاسس...







  لو كنت الهًا
! كم من مرة حاولت تفهم فكرة الله وكم من مرة فشلت في جعلها منطقية!
 فان يكون همك الاكبر هو "الانا" الخاص بك وكبرياءك, لا تدخل ضمن السيرة الذاتية لالهات المنتخبة!
 اله لا يقاتل الشر بحجة هروبه من السماء السابعة,والله يرضى بحرب هنا وحرب هناك, طفل معاق هنا وكهل مشلول الحركة هناك, لا اظنه على قدر من المسؤولية التي حملت له برضى منه!
 اله يمتعظ من ان تكفر اسمه او تسبه, لا يذكرني سوى بزميلي في الحضانة عندما كان يشتاط غيظًا ان سببت اباه, فهل الهنا لا زال في مرحلة الحضانة الالوهية اذا, ويعاني من ال"ولدنة"؟
 اله يدعو لتبجيله وذكر اسمه والصلاة اليه ليلاً نهارا, لا يذكرني الا بملك مصاب بجنون العظمة والكثير من "الانا", فتراه ينصب التماثيل له شمالا يمينا, يجبر الناس على تبجيله وخدمته "عاش الملك"!
 اله يسن قانون العقوبات الاكثر غرابة على وجه الاطلاق,اذ يعاقب الانسان على تصرفاته, والتي بدورها تنبع اما من صفاته وشهواته, والتي بدورها انتقلت له اما وراثيا واما اكتسبها من البيئة المحيطة(طريقة اكتسابها من البيئة مرتبطة صفاته الوراثية ايضًا), واما من هبة الله له, روحه!

 لو كنت الهًا, لقتلت نفسي!
  وشكله لو كان في اله, قتل حاله زمان على هيك خلل بهيك لعبة!


العربوش:
 هو العربي الوافد الى الجامعة عادة, فيكتسب عادات وتصرفات غريبة عن المجتمع العربي, مثل السهر على الديشة مع ارجيلة وجنس اخر, الذهاب الى القهواي, الخ, وبذلك يعتقد ضمنياً انه ضمن حركة ثورة مجتمعاتية على العادات والتقاليد, فيرى بتفسه حداثيا, لكن الواقع هو انه اكتسب صفات وعادات البيئة الجديدة, وتماشى معها وسار مع التيار وخلف القطيع, وبذلك بقي عددا مجهول الهوية


01‏/01‏/2011

قائمة: اكثر 25 اغنية سماعًا, على ذمة الايفون

اعزائي عزيزاتي سادتي, نقدم لكم قائمة اكثر 25 اغنية انا بسمعها ع راي الايفون (اي بود), مع اني اشكك بالنتائج, لكن هذا افضل مصدر متواجد حاليًا:
ملاحظة: هذه الاغاني لا تعبر عن رأي الناشر :P
ملاحظة ثانية: مش محطوطات بالترتيب!