لشو التغيير بهل بلد؟ ااه؟!
انه ماله لو النسوان تضل تحيك, وبلا ما تخلص الكنزة!
ماله لو شباب البلد, بعدها شباب البلد, نفس القصص والحكايات, وماله اذا حسيت انه بالبلد وقف الوقت, مالها "النترلة", ماله اذا كل واحد بعده واقف محله, لا كتاب جديد عل مكتبة (غير "
كتاب الرائد" المتناقل من ابن العم لابن الخال طبعا) ولا فكرة جديدة بتمرق براسهن (
ممكن فكرة نكاح جديدة, بس حتى بهاي: الطريقة ذاتها بس البنت الجديدة جديدة عل فكرة), حتى رؤوس الارجيلة هي ذاتها, مع نفس سواد المعسل والكسر الي على جنب, حتى خشونة الايدين الكادحة هي نفسها!
ماله لو ما في طفولة بالبلد, مع انها بتفيض طفولة شمال يمين, انه خلي الطفل يستطفل بالشارع بلا ولا شي, يسرق مشمشات
الحج نادر ويهرب, يقفز ويلف بكل زقاقات البلد بلا جزمة باجره, لعل وعسى تعلم قسوة هل حياة من زفتة الشارع, بلا ما يتعلمها من زفت الحياة!
وماله لو في البلد, بين كل دبة(طبة-مطب) ودبة في نتوفة شارع, انه لعل وعسى مع الزمن السيارات في البلد بتتعلم وبتتعود عل نط, عشان يوم الزحف الكبير انط بالسيارات فوق الحدود!
وماله اذا بالبلد باعوا الدنيا وما فيها, وفاتوا بحالة اتحاد رهيب مع اللا شي, وسلموا امورهم للقدر والقضاء, انه عل قليلة "متأملين خير" و "ان شاء الله" هي كلمة المفتاح...
وماله انه كل ما اسمع "
بشوفك في البلد", اخر بلد ممكن اغير اسم يافا لاسمها هي بلدي انا, واذا بالغلط طلع شي بنت بهل بلد, فالاغنية بتكون "
بشوفك بشي عزلة قريبة عل بلد"!!
وماله اذا بالبلد, بتحس الذكور من كوكب والاناث من كوكب, وطريقة التواصل الوحيدة بين الشباب والصبايا هي اصوات تفحيط عجال السيارة وزماميرها, انه مش غلط, عل قليلي بتواصلوا!
وماله لو زلام هل بلد اتفقوا انه ما يتفقوا, بس بنفس الوقت, اتفقوا ع انهم الادرى بمصلحتك وكيف حياتك تكون, واتفقوا ينعلوا سلسبيل سيرتك كل ما يسير في غموض حولين حياتك في البلاد البعيدة, وماله مش غلط, بركي على جثتي بتعلموا يتفقوا بالنهاية بشغلات اكبر مثلا, بتفقوا انه يكون مكتبة بالبلد هو ضرورة مثلا, مش مزينات او كماليات, بركي بيتفقوا على الجدار الى ماكل نص الشارع ونص ارض الجار, بركي اتفقوا على انه القضية مش فيهن, وانه القضية بالبلد!
\\مش غلط, مش غلط انه بالبلد ربطة الخبز ال 20 ب 10, وقنينة الكولا بعدها ب 6 شيكل, والقهوة بعدها بتستنى ع برندة دار سيدي باي وقت, وستك بعدها نبع حنان بالزبط زي قبل 20 سنة, وسيدك قد ما يعصب بتغدر تسرق منه ضحكة من القلب. وانه هوا البلد غير, وانه قد ما تغيب محلك محفور بقلوب عيلتك وصحابك, \\مش غلط انه هالبلد بعدها بلد, او ممكن غلط, مش عارف!
بس الي بعرفه انه انا بعدني نفس الاشي بهل تيار الجارف بالبلد, انه قد ما استقويت, مش رح اغير هل بلد, واكبر معجزة ممكن اعملها, انه هل بلد ما تغيرني, وما تسترجعني من ارض الغير مباح بالقوة والجذب وترجع تقوقعني بالزبط كيف ما بدها اياني, شي رقم بتعداد ال
5000 نسمة الي بالبلد!
 |
| أنا والقهوة والبلد |
